O‘zbekiston Respublikasi Prezidentining 2022-yil 19-yanvardagi  "Mahallalarda yoshlar bilan ishlash tizimini tubdan takomillashtirish chora-tadbirlari to‘g‘risida"gi PQ-92-sonli qarorining ijrosini ta’minlash yuzasidan Nurobod tumanida bir qator amaliy ishlar olib borilmoqda.

Xususan, uzoq yillar davomidagi samarali mehnatlari bilan ta’lim taraqqiyotiga, ma’naviy-ma’rifiy sohalar rivojiga munosib hissa qo‘shgan va ayni paytda ham jamiyatimiz hayotida faol ishtirok etib kelayotgan nuroniylarning yoshlar bilan uchrashuvlari tashkil etib kelinmoqda.

Bugun Nurobod tumani Madaniyat saroyida "Uch avlod uchrashuvi" tadbiri o'tkazilib, unda tuman hokimi o'rinbosari S.Xujamiyarov, Nuroniylar jamg'armasi Samarqand viloyat bo‘limi raisi o‘rinbosari G.Husaynova, jamg'armaning Nurobod tuman bo'limi raisi D.Xushvaqtov, filologiya fanlari doktori, professor, "Shuhrat” medali sohibi S.Karimov, mehnat faxriylari, nuroniylar va o'quvchi-yoshlar ishtirok etishdi.

Nuroniylar jamg'armasi Nurobod tuman bo'limi tomonidan o'tkazilgan ushbu tadbir avvalida O‘zbekistonda xizmat ko‘rsatgan yoshlar murabbiyi E. Rahimov, O‘zbekiston yozuvchilar uyumasi a’zosi, mehnat faxriysi S.Xudoyorov, Samarqand Davlat tibbiyot universiteti professori Y.Allayarov kabi fan, ta'lim, sport sohasi fidoyilari va boshqa mehnat faxriylari so'zga chiqib, yoshlarga o'zlarining boy hayotiy tajribalaridan kelib chiqqan holda kerakli tavsiya va o'gitlar berishdi, ularni Vatanni sevishga, yurt ravnaqi yo'lida munosib xizmat qiladigan insonlar bo'lib yetishish uchun puxta bilim olishga chaqirishdi.

Uchrashuvda uzoq yillik mehnat faoliyati bilan tuman rivoji, aholi va jamiyat farovonligiga munosib hissa qo'shgan faxriylar xotirasi yodga olinib, ayni kunda el ardog'ida bo'lib kelayotgan ana shunday faxriylarning bir guruhiga Nuroniylar jamg'armasi Samarqand viloyat bo‘limining tashakkurnoma va qimmatbaho esdalik sovg'alari topshirildi.

Tadbir so'nggida uch avlod vakillari suhbati mo'jaz dasturxon atrofida davom etib, tuman madaniyat bo'limi xushovoz xonandalari tomonidan ijro etilgan kuy-qo'shiqlar yig'ilganlarga yuqori kayfiyat ulashdi.