So‘nggi yillarda qishloq xo‘jaligini isloh qilish, sohaga bozor mexanizmlarini joriy etish, aholini daromadli mehnat bilan band qilish va oziq-ovqat xavfsizligini ta’minlash maqsadida Nurobod tumanida ham izchil chora-tadbirlar amalga oshirilmoqda.

Brifingda Nurobod tumani hokimining qishloq va suv xo‘jaligi masalalari bo‘yicha o‘rinbosari Dilmurod Qorayev ushbu borada bajarilgan ishlar va erishilgan natijalar haqida ma’lumot berdi.

Eksportbop ekinlarni yetishtirishga e’tibor kuchaymoqda

Ma’lumotlarga ko‘ra, bugungi kunda mamlakatimizda yetishtirilayotgan 80 turdan ortiq qishloq xo‘jaligi mahsulotlari dunyoning 66 mamlakatiga eksport qilinmoqda. Shu bois, paxta va g‘alladan qisqartirilayotgan yer maydonlarida bog‘dorchilik, uzumchilik, poliz, sabzavotchilik, dukkakli va moyli ekinlarni ko‘paytirish orqali qo‘shimcha daromad olish imkoniyatlari yaratilmoqda.

Statistik tahlillarga ko‘ra, 1 gektar paxtaga nisbatan uzumdan 7 baravar, gilosdan 6 baravar, yong‘oqdan esa 5 baravar ko‘proq daromad olish mumkin. Shuningdek, ushbu loyihalar doirasida “Temir daftar”, “Ayollar daftari” va “Yoshlar daftari”da ro‘yxatda turgan ehtiyojmand oilalar yer maydonlari bilan ta’minlanib, ularning bandligi va daromad topishiga ko‘maklashilmoqda.

Yerlardan samarali foydalanish bo‘yicha qarorlar ijrosi ta’minlanmoqda

Prezidentning 2021-yil 23-noyabrdagi PQ-20-sonli va Vazirlar Mahkamasining 2021-yil 24-noyabrdagi 709-sonli qarorlariga asosan tumanda paxta va g‘alladan qisqartirilgan yerlar aholiga ajratilib, intensiv bog‘dorchilik va boshqa ekinlar yetishtirishga yo‘naltirildi.

2021-yil oxirida Xalq deputatlari tuman Kengashining qaroriga binoan tumandagi 41 ta fermer xo‘jaligi yerlaridan jami 208 gektar yer lotlarga ajratilib, auksion orqali aholiga berildi. Hozir ushbu yerlarda qishloq xo‘jaligi ekinlari yetishtirilmoqda.

Oziq-ovqat xavfsizligini ta’minlash va mahsulot yetishtirish ko‘paymoqda

2022-yilning iyul oyida Prezidentimiz raisligida o‘tkazilgan videoselektorda belgilangan vazifalar doirasida tumanda aholiga qo‘shimcha 84 gektar sug‘oriladigan yer maydonlari ajratildi.

Shuningdek, paxta va g‘alla maydonlaridan qisqartirilgan 185 gektar yer 0,1–1,0 gektarlik 344 ta lotga ajratilib, “E-auksion” orqali aholiga berildi. Ushbu maydonlarga quyidagi ekinlar ekilgan:

• 17,5 gektar — kartoshka,

• 17 gektar — mosh,

• 13,1 gektar — piyoz,

• 126 gektar — moyli ekinlar,

• 11,1 gektar — poliz ekinlari.

Brifingda qayd etilganidek, amalga oshirilayotgan islohotlar natijasida tumanda yer resurslaridan samarali foydalanish, eksportbop ekinlarni yetishtirish va aholining daromadlarini oshirishga erishilmoqda. Kelgusida ham bu boradagi ishlar davom ettirilib, ilmiy asoslangan yondashuv va zamonaviy texnologiyalarni keng joriy etishga alohida e’tibor qaratiladi.