Nurobod tuman hokimligida Maktabgacha va maktab ta’limi bo‘limi boshlig‘i Shavkat Xushbaqtov ishtirokida “O‘quvchilarning bo‘sh vaqtini mazmunli tashkil etish borasida amalga oshirilayotgan ishlar” mavzusida matbuot brifingi bo‘lib o‘tdi.

Unda tumandagi o‘quvchi-yoshlarning bilim olishi, ularning bo‘sh vaqtini samarali o‘tkazishi, fan va kasb-hunar yo‘nalishlaridagi yutuqlar, shuningdek ta’lim muassasalarining moddiy-texnik bazasini mustahkamlash bo‘yicha amalga oshirilgan ishlarga oid ma’lumotlar berib o‘tildi.

Fan olimpiadalari bo‘yicha:
2024-yil noyabr-dekabr oylarida o‘tkazilgan 15 ta fandan Respublika fan olimpiadasining viloyat bosqichida 108 nafar o‘quvchi ishtirok etdi. Ulardan 2-, 13-, 65-maktab o‘quvchilari faxrli 2- va 3-o‘rinlarni egalladi.
2025-yilgi Asosiy fan olimpiadasining Respublika bosqichida esa 13-maktabdan Raimboyeva Bahora Ne’matovna va 65-maktabdan Abdumajidov Najot Zafarovich tojik tili va adabiyoti fanidan ishtirok etib, mos ravishda 7- va 15-o‘rinlarni qo‘lga kiritishdi.

Oliy ta’limga kirish ko‘rsatkichlari:
2022–2023-o‘quv yili bitiruvchilarining 44,8% (877 nafar) oliy ta’limga kirgan bo‘lsa, 2023–2024-o‘quv yili bu ko‘rsatkich 47,4% (961 nafar)ga yetdi. O‘zbekiston OTMlariga kirganlar soni 498 nafardan 564 nafarga oshdi, bitiruvchilar o‘rtacha balli esa 72,8 ga yetdi. 2024–2025-yil yakunida ushbu ko‘rsatkichni 50% ga yetkazish rejalashtirilgan.

Kasb-hunar va xorijiy tillarni o‘qitish:
2024–2025-o‘quv yilida 2-, 13-, 16-, 22-, 30-, 61-maktablarda o‘quvchilarga “Yosh dasturchi”, “Grafik muharriri”, “Tikuvchilik”, “WEB dizayner” yo‘nalishlarida kasbiy ta’lim yo‘lga qo‘yildi. Xonalar jihozlandi va tikuvchilik yo‘nalishi uchun zarur xom ashyo ajratildi.

Moddiy-texnik baza:
O‘tgan davrda tumandagi bir nechta maktablarda yangi qo‘shimcha binolar qurilib foydalanishga topshirildi, ta’mirlash va jihozlash ishlari amalga oshirildi, ichimlik suvi va qayta tiklanuvchi energiya manbalari bilan ta’minlash ishlari bajarildi. Jumladan:

• 28-, 67-, 41-maktablarga qo‘shimcha binolar qurildi.

• 36- va 69-maktablarda joriy ta’mirlash ishlari amalga oshirildi.

• 11 ta maktab va 6 ta MTTga qayta tiklanuvchi energiya manbalari o‘rnatildi.

Xulosa:
Shavkat Xushbaqtov ta’kidlaganidek, o‘quvchilarni ilmga, kasb-hunarga va sportga yo‘naltirish, ularning bo‘sh vaqtini mazmunli tashkil etish bo‘yicha amaliy ishlar izchil davom ettiriladi. Maktab va bog‘chalar uchun zarur shart-sharoitlar yaratish, pedagoglar malakasini oshirish va o‘quvchilar yutuqlarini rag‘batlantirish doimiy e’tiborda bo‘ladi.