Joriy yilning iyul oyida Nurobod tumani hokimligida tuman hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari Sirojiddin Xujamiyarov ishtirokida “Tuman maktabgacha va maktab ta’limi tizimida amalga oshirilayotgan ishlar va kelgusi rejalar to‘g‘risida” mavzusida ochiq muloqot bo‘lib o‘tdi.

Tadbirda tuman maktabgacha va maktab ta’limi bo‘limi rahbariyati, maktab va maktabgacha ta’lim muassasalari rahbarlari, pedagog xodimlar hamda jamoatchilik vakillari qatnashib, sohada amalga oshirilayotgan ishlar, erishilgan yutuqlar, mavjud muammolar va istiqboldagi rejalar atroflicha muhokama qilindi.

Maktabgacha ta’lim qamrovi oshmoqda

Bugungi kunda tuman maktabgacha va maktab ta’limi bo‘limi tasarrufida 78 ta umumiy o‘rta ta’lim maktabi, 1 ta “Barkamol avlod” bolalar maktabi hamda 150 ta maktabgacha ta’lim tashkiloti faoliyat yuritmoqda. Ularning 28 tasi davlat, 115 tasi oilaviy, 7 tasi davlat-xususiy sheriklik asosida faoliyat olib bormoqda.

Tumanda 3–7 yoshli 14 912 nafar bolalarning 9 846 nafari maktabgacha ta’limga qamrab olinib, qamrov darajasi 66 foizga yetkazilgan. 2025-yil yakuniga qadar bu ko‘rsatkichni 68,8 foizga yetkazish rejalashtirilgan.

Yil davomida “Saxoba”, “Lolazor” va “Oltinsoy” mahallalarida yangi maktabgacha ta’lim binolari, 7 ta oilaviy bog‘cha va 1 ta davlat-xususiy bog‘cha ochilishi kutilmoqda. Shuningdek, umumiy o‘rta ta’lim maktablaridagi bo‘sh xonalardan samarali foydalanish hisobiga bepul tayyorlov guruhlari soni 83 taga yetkazilib, u yerda 3 538 nafar 6 yoshli bola tarbiyalanmoqda.

Ta’lim sifati va pedagoglar malakasi oshirilmoqda

Tumandagi maktablarda 32 203 nafar o‘quvchiga 3 302 nafar pedagog ta’lim-tarbiya bermoqda. Ularning 74,1 foizi oliy ma’lumotli bo‘lib, bu ko‘rsatkich yildan-yilga oshib bormoqda. O‘qituvchilarning toifasini oshirish, yosh kadrlarni jalb etish va ularning malakasini yuksaltirish bo‘yicha tizimli ishlar amalga oshirilmoqda. O‘quv yilida 998 nafar pedagog malaka oshirish kurslarini tamomladi va sertifikatlarga ega bo‘ldi.

O‘qituvchilar uchun “Kasbiy rivojlantirish kuni” va “Kasbiy rivojlantirish soati” o‘quv-mashg‘ulotlari yo‘lga qo‘yilib, ularning ko‘nikmalari amaliy mashg‘ulotlar orqali oshirilmoqda.

Fan olimpiadalari va oliy ta’limga qamrov

2024-yilning noyabr–dekabr oylarida o‘tkazilgan Respublika fan olimpiadasining viloyat bosqichida 108 nafar o‘quvchi ishtirok etib, 2-, 13- va 65-maktab o‘quvchilari faxrli o‘rinlarni qo‘lga kiritishdi. Shuningdek, tojik tili va adabiyoti fanidan 13-maktabning Raimboyeva Bahora va 65-maktabning Abdumajidov Najot Respublika bosqichida ham muvaffaqiyatli ishtirok etib, munosib natijalar qayd etishdi.

Bitiruvchilarning oliy ta’limga qabul ko‘rsatkichi ham yildan-yilga oshib, 2023–2024-o‘quv yilida 961 nafar bitiruvchi oliy ta’limga qabul qilindi (47,4%). Kelgusida bu ko‘rsatkichni 50 foizga yetkazish maqsad qilingan.

Kasbiy yo‘nalishlar va zamonaviy kasblar o‘rgatilmoqda

O‘quvchilarning zamonaviy kasblar va xorijiy tillarni o‘rganishiga katta e’tibor qaratilib, tumandagi qator maktablarda “Yosh dasturchi”, “WEB dizayner”, “Grafik muharriri”, “Tikuvchilik” kabi yo‘nalishlarda kasbiy ta’lim darslari yo‘lga qo‘yildi.

Moddiy-texnika bazasi yuksalmoqda

Tuman maktab va maktabgacha ta’lim muassasalarining moddiy-texnik bazasini mustahkamlash bo‘yicha bir qator yirik ishlar amalga oshirildi. Jumladan:

• 28-, 41- va 67-maktablarda qo‘shimcha binolar qurilib, foydalanishga topshirildi.

• 36- va 69-maktablarda joriy ta’mirlash ishlari olib borildi.

• 78 ta maktabda ta’mirlash va obodonlashtirish ishlari, ichimlik suvi ta’minoti yaxshilandi.

• Qayta tiklanuvchi energiya manbalari o‘rnatildi.

Yakuniy xulosa

Ochiq muloqot davomida tumanda ta’lim sifatini oshirish, maktabgacha ta’lim qamrovini kengaytirish, pedagoglar malakasini oshirish, o‘quvchilarning bilimini yuksaltirish, kasbiy yo‘nalishlarni rivojlantirish va moddiy-texnika bazasini yanada mustahkamlash bo‘yicha amalga oshirilgan ishlar yuqori baholandi.

Shuningdek, istiqboldagi rejalar, mavjud muammolar va ularning yechimlari yuzasidan ham atroflicha fikr almashildi. Mutasaddilarga belgilangan vazifalarni izchil bajarish bo‘yicha ko‘rsatmalar berildi.