Nurobod tumanida aholiga qulay, toza va yashil muhit yaratish maqsadida obodonlashtirish-bunyodkorlik ishlari keng ko‘lamda davom etmoqda. Ayni kunlarda tumanning markaziy hamda ichki ko‘chalarini asfaltlash, piyodalar yo'lakchasi qurish, xazonlarni yig‘ishtirish, chiqindilarni tozalash, daraxt va ko‘kalamzorlarni parvarishlash bo‘yicha amaliy ishlar olib borilmoqda.

Bu ishlar nafaqat hudud ko‘rinishini yanada chiroyli va tartibli qiladi, balki ekologik muhitni yaxshilash, havoning tozaligini oshirish va aholi salomatligi uchun qulay sharoit yaratishga xizmat qiladi. Daraxtlardan to‘kilgan barglar vaqtida yig‘ishtirib olinishi — hudud estetikasini saqlash bilan birga, atrof-muhitga zarar yetkazuvchi omillarni kamaytirishga yordam bermoqda.

Tuman Obodonlashtirish boshqarmasi xodimlari mazkur jarayonlarda alohida mas’uliyat va fidoyilik bilan faol ishtirok etishmoqda. Ular erta tongdan boshlab ko‘chalarni supurish, xazonlarni yig‘ish, chiqindilarni tashish, yashil hududlarni parvarishlash kabi muhim vazifalarni bajarib, tumanning yanada ko‘rkam va zamonaviy qiyofaga ega bo‘lishiga o‘z hissalarini qo‘shmoqda.

Nurobodda olib borilayotgan bu keng ko‘lamli obodonlashtirish ishlari — nafaqat bugungi kun uchun, balki ertangi avlod uchun ham sog‘lom, toza va yashil muhit yaratish yo‘lidagi muhim qadamdir.