Bugun Nurobod tumani 18-son Bolalar musiqa va san’at maktabida “Bir nuroniy – o‘n yoshga mas’ul” Respublika ko‘rik-tanlovining tuman bosqichi bo‘lib o‘tdi. Tadbirda tumanning 39 ta mahallasidan kelgan nuroniylar ishtirok etib, o‘z bilim va mahoratlarini sinovdan o‘tkazdilar.

Mazkur tanlov yurtimizda keksalarga bo‘lgan hurmat va e’tiborning yaqqol ifodasi bo‘lib, nuroniylarning jamiyat hayotidagi faolligini yanada kuchaytirish, ularning boy tajribasini yoshlar ongiga singdirish maqsadida tashkil etilmoqda.

Musobaqa uchta shart asosida tashkil etilib, ishtirokchilar o'zlariga biriktirilgan o'n nafar yoshlar bo'yicha qilgan amaliy ishlarini hakamlar hay`atiga taqdim etishdi.

Tadbir davomida musiqa va san’at maktabi o‘quvchilari tomonidan ijro etilgan kuy-qo‘shiqlar, go'zal raqslar nuroniylarimizga ko'tarinki kayfiyat bag'ishladi.

Tanlov yakunida g‘olib va sovrindorlar diplom va pul yutuqlari bilan taqdirlandi.