Nurobod tumanida “Mahoratli o‘qituvchi – millat tayanchi” shiori ostida to‘rtinchi “Ustozlar milliy forumi” o‘tkazildi. 

Tadbirda tuman hokimligi masʼullari, ta'lim tizimi faxriylari, maktabgacha va maktab ta’lim tizimi rahbarlari hamda o‘qituvchi va murabbiylar ishtirok etishdi.

Forumda o‘tgan o‘quv yilida amalga oshirilgan ishlar tahlil qilinib, yangi o‘quv yili uchun ustuvor vazifalar belgilandi. Xususan, ta’lim-tarbiya sifatini oshirish, xalqaro talablarga mos o‘quv dasturlari va metodik majmualarni samarali joriy etish masalalariga alohida e’tibor qaratildi.

Shuningdek, yosh pedagoglarni qo‘llab-quvvatlash, ilg‘or tajribalarni amaliyotga tatbiq etish, hamda zamonaviy ta’lim yondashuvlarini keng qo‘llash bo‘yicha tavsiyalar berildi. 

Forum doirasida ta’lim tizimini rivojlantirish bo‘yicha yangi tashabbuslar ilgari surilib, bir guruh faol va tashabbuskor ustozlar tuman tashakkurnomasi hamda esdalik sovg‘alari bilan taqdirlandi.