Нуробод тумани ҳокимининг қарори қабул қилинди

Нуробод тумани ҳудудларининг анъанавийлигига эътибор берган холда замонавий архитектура ва шаҳарсозлик талаблари ҳамда технологияларни ҳисобга олиб ривожлантиришни режалаштириш, шунингдек қуриш лойиҳаларида шаҳарсозлик тўғрисидаги қонун ҳужжатларига риоя этилишини таъминлаш бугунги куннинг энг асосий вазифаларидан биридир.

Жорий йилнинг 22 октябрь куни Нуробод тумани ҳокимининг “Вилоят ҳокимининг 2019 йил 18 октябрдаги 285-Қ-сонли “Самарқанд вилоятида бино ва иншоотларнинг ташқи кўринишини ўзгартириш, объектни қайта ихтисослаштириш ва реконструкция қилиш, қурилиш (реконструкция) тугалланган бино ва иншоотларни фойдаланишга қабул қилиш борасидаги ишларни янада такомиллаштириш бўйича қўшимча чора-тадбирлар тўғрисида”ги қарори ижросини таъминлаш тўғрисида”ги 2434-сон қарори қабул қилинди.

Қарорда туман қурилиш бўлими, туман ер ресурслари ва давлат кадастри бўлими, туман санитария-эпидемиология назорати маркази, туман ёнғин хавфсизлиги бўлимлари Ўзбекистан Республикаси Вазирлар Махкамасининг   2018 йил 18 майдаги “Архитектура ва қурилиш соҳасида давлат хизматлари кўрсатишнинг айрим маъмурий регламентларини тасдиқлаш тўғрисида”ги            370-сон қарори билан тасдикланган:

а)  “Бино ва иншоотнинг ташқи кўринишини ўзгартиришни келишиш бўйича давлат хизматлари кўрсатишнинг маъмурий регламенти”нинг қуйидаги талабларига:

бино ва иншоотларнинг лойиҳа эскизини келишмасдан туриб бино ва иншоот ташқи кўринишини ўзгартириш тақиқланиши;

бино ва иншоотнинг ташқи кўринишини ўзгартиришни келишиш тартиботини амалга оширишда:

туман қурилиш бўлими (ваколатли орган) бино ва иншоот фасадининг эскиз лойиҳасини келишиши;

туман “Ермулккадастр” давлат корхонаси бино ва иншоот деворларининг режаси, кесими (мавжуд бўлса), фасади ва кадастр паспорти нусхаларини юбориши;

б)  “Объектни қайта ихтисослаштириш ва реконструкция қилиш учун рухсатнома бериш бўйича давлат хизматларини кўрсатишнинг маъмурий регламенти”нинг қуйидаги талабларига:

объектни рухсатномасиз қайта ихтисослаштириш ва реконструкция қилиш тақиқланиши;

рухсатнома бериш тартиботини амалга оширишда:

шахар, туман қурилиш бўлимлари (ваколатли орган) рухсатнома бериши;

туман “Ермулккадастр давлат корхонаси бино ва иншоотнинг деворлари, кесими (агар мавжуд бўлса), фасад режаси ва кадастр паспорти нусхасини юбориши;

в) Қурилиши (реконструкцияси) тугалланган бино ва иншоотларни фойдаланишга қабул қилиш бўйича давлат хизматлари кўрсатишнинг маъмурий регламенти”нинг қуйидаги талабларига:

фойдаланишга қабул қилиш далолатномасисиз объектларни фойдаланишга кабул қилиш тақиқланиши;

қурилиши тугалланган объектларни фойдаланишга қабул қилиш тартиботида:

туман “Ермулккадастр давлат корхонаси далолатнома лойиҳасини ишлаб чиқиши;

туман қурилиш бўлимлари далолатнома лойиҳаларини келишиши;

туман давлат санитария эпидемиология назорати маркази, туман ёнғин хавфсизлиги ҳаракати бўлими, қурилиш соҳасида назорат бўйича ҳудудий инспекциялар объектларни фойдаланишга қабул қилиш далолатномалари лойиҳаларини келишиши юзасидан белгиланган тартибга қатъий амал килишлари кўрсатиб ўтилган.

         Шунингдек, қарорда туман ҳудудида бино ва иншоотларнинг ташқи кўринишини ўзгартириш, объектни қайта ихтисослаштириш ва реконструкция қилиш имкониятларини ўрганиб чиқиш бўйича ваколатли органларга кўмаклашувчи ишчи гуруҳ тузилиши ҳамда ишчи гуруҳнинг намунавий таркиби иловага мувофиқ тасдикланиши кўрсатиб ўтилган.

Ишчи гуруҳининг асосий вазифалари этиб қуйидаги вазифалар белгиланган:

бино ва иншоотнинг ташқи кўринишини ўзгартириш юзасидан сўровномалар бўйича:

жойига бориб, бино ва иншоот мақсадидан келиб чиққан ҳолда, бино ва иншоотнинг ташқи кўринишини ўзгартириш имкониятини ўрганиб чиқиш, бунда:

бутун бино ва иншоотни ёки уларнинг қисмлари ва уларга бириктирилган ер участкасини, шунингдек уларга туташ ҳудуд ва улар яқинидаги бино ва иншоотларни визуал кўрикдан (зарурат бўлганда, махсус ускуналар ва асбоблардан фойдаланган ҳолда) ўтказиш;

бино ва иншоотларни кўздан кечириш, ариза берувчи сўровномасида, шунингдек бино ва иншоотнинг деворлари, кесими (мавжуд бўлса), фасад режалари ва кадастр паспорти нусхаларидаги маълумотларни бино ва иншоотларнинг ҳозирги холатига, бино ва иншоотлар ташқи кўринишини ўзгартиришни келишмасдан, шунингдек, ваколатли орган билан келишилган бино ва иншоотлар фасадининг эскиз лойиҳасидан четга чиққан ҳолда                        қурилиш-таъмирлаш ишларини амалга ошириш ҳолатини аниклаш юзасидан таққослашни амалга ошириш;

объектларни қайта ихтисослаштириш ва реконструкция қилиш учун рухсатномалар бериш юзасидан сўровномалар бўйича:

объектни қайта ихтисослаштириш ва реконструкция қилиш имкониятларини ўрганиб чиқиш, бунда:

бутун бино ва иншоотни ёки уларнинг қисмлари ва уларга бириктирилган ер участкасини, шунингдек, уларга туташ ҳудуд ҳамда бино ва иншоотларни визуал кўрикдан (зарурат бўлганда, махсус ускуналар ва асбоблардан фойдаланган ҳолда) ўтказиш;

бино ва иншоот ўзбошимчалик билан қурилганини (лойиҳа-смета ҳужжатларини келишмасдан ва тегишли тартибда экспертизадан ўтказмасдан туриб қурилганини, объектнинг лойиҳа-смета ҳужжатларидан четга чиққан ҳолда ҳамда шаҳарсозлик нормалари ва қоидаларини бузган ҳолда куриш ва реконструкция қилингани) аниқлаш мақсадида, бино ва иншоотни текширувдан ўтказиш ҳамда ариза берувчи сўровномасида, шунингдек бино ва иншоотнинг деворлари режаси, кесими (мавжуд бўлса), фасад ва кадастр паспорти нусхасида берилган маълумотларни бино ва иншоотнинг ҳақиқий ҳолати билан таққослашни амалга ошириш;

ўрганиш натижалари бўйича далолатнома расмийлаштириб (объектни камида икки томондан ўраб турган объектлар билан фотосурати (15x20 см) илова қилинади), ваколатли органларга тақдим этиши белгиланган.

          Мазкур қарор расмий эълон қилинган кундан бошлаб кучга киради.

2015-2024 © Нуробод туман ҳокимлиги. Сайт яратувчиси: SAKTRM